中環出更：施榮懷精明轉飲二鍋頭
商會應酬多，不乏飲得之人，好似中華廠商會內，亦臥虎藏龍，會長施榮懷（Irons）堪稱「酒仙」，紅酒、茅台，杯杯清。不過，茅台近年大幅漲價，佢決定投向二鍋頭懷抱，月前喺北京柯打十箱二鍋頭，準備大宴親朋。
廠商會尋日喺上海總會舉行工展會慶功宴，去年工展會丁財兩旺，人流同銷售額均創新高，前會長黃友嘉及現任副會長吳清煥、徐晉暉、展覽服務有限公司主席吳永嘉、副主席李慧芬等，齊舉杯祝賀。
茅台身價暴漲
Irons心情勁靚，滿場飛敬酒，好多人都知佢酒量非淺，無他，廠商會應酬多，除咗每月有會董晚宴，仲有大小宴請飯局，每餐例必勁飲紅酒、茅台酒，消耗量唔細。可惜茅台近年身價暴漲，一斤裝茅台叫價二千六百多元，相比之下，同等分量嘅二鍋頭，每支只係「五舊水」。
Irons話，部分會董宴會，都係「自己友」夾錢，但並非人人鍾意飲茅台，如果硬要對方夾錢，並唔划算。近年，佢愛上二鍋頭，愈飲愈滋味，所以希望公諸同好，月前已購入六十支精品二鍋頭，將廣邀廠商會好友試真啲。
講番廠商會新年嘅大計，專責展覽服務嘅吳永嘉就話，將會帶領港商北上賺人仔。龍年頭炮，係四月二十八日喺武漢舉行工展會，二百四十個攤位，已經租得八八九九，副主席李慧芬都話十分期待，嚟緊將會中港兩地氹氹轉，大發神州財。
卓妮