長實主席李嘉誠入院通波仔？嘩，咁大件事，有可能影響市場波動喎。
咦，咪住先，呢一則消息原來係淫賤黎旗下壹淫媒嘅《壹週刊》獨家報道，可信性當堂大打折扣。打幾多折好呢？計功夫茶話齋，零折。事關壹淫媒所有刊物一向冇乜公信力，老作捏造多不勝數，而且一旦牽涉誠哥，十居其十係流料。
果然不出所料，長實集團發表聲明澄清，關於李嘉誠通波仔嘅所謂報道完全捏造，誠哥從來冇做過任何同心臟或者血管有關嘅手術，而且冇計劃做手術，亦毋須服用任何有關嘅藥物。簡單咁講，李嘉誠身體非常健康。
一次係咁，兩次係咁，餐餐都係咁，淫賤黎惡意中傷李嘉誠，目的來來去去只有一個。由於誠哥一向唔妥淫賤黎誨淫誨盜，旗下集團拒絕幫襯壹淫媒落廣告，所以懷恨在心嘅淫賤黎就不斷生安白造發動攻擊，呢家嘢叫做變相勒索，目的係強迫長實落廣告。稍稍唔同嘅係，以前通常係耍無賴作古仔，今次就變本加厲玩詛咒。喂，新年流流話人哋入院通波仔，捏造得既陰險又毒辣，唔係詛咒又係乜呢？而且呢一種詛咒充滿八婆味道，睇怕淫賤黎前世一定係潑婦。
如果功夫茶係壹淫媒主管，收到柯打話要利用詛咒去逼人哋落廣告，咁就易過借火嘞，過時過節都有大把靈感可供發揮，根本毋須求證都可以作到天花龍鳳，甚至乎年頭已經可以預先作到年尾，到時到候就推出人身攻擊誣衊實錄。
情人節咩，梗係老作人哋偷情啦；清明節咩，唱衰人哋祖墓風水差囉；端午節咩，游龍舟水就當係跳海自殺；中秋節咩，食月餅係會骾喉窒息嘅；萬聖節咩，呢一個鬼聲鬼氣嘅節日最好就係話人哋撞鬼嘞；聖誕節咩，好簡單啫，屈人哋唔學聖誕老人派禮物，有違慈善家形象。
即係咁，功夫茶奉勸大家，以後但凡壹淫媒提到李嘉誠三個字，純粹當笑料看待得嘞，真實程度絕對小過某啲身材欠佳女星嘅胸部。隆胸都建基於小部分天賦本錢吖，壹淫媒作古仔係可以無中生有o架。
其實呢，功夫茶有一件事相當唔明，有人一而再，再而三玩捏造，長實點解唔告到佢甩褲？畢竟誹謗係一種犯法行為，而且已經唔係第一次嘞，每隔一頭半個月就誹謗一次，頻密過女性周期生理現象。你知啦，淫賤黎反中亂港不特止，仲要販賣色情教壞細路。假如長實以其人之道還治其人之身，索取極具阻嚇作用嘅懲罰性賠償，一來自己唔使再受到滋擾，二來咯喎，當係為民除害都好吖！
嗱，功夫茶強烈建議長實出手儆惡懲奸，烏蠅唔拍係唔會死o架！