中環出更：名人赤腳履冰 體驗窮滋味
尋日氣溫又急降，大家都識拿拿聲着多件衫，但對於缺乏保暖衣物嘅長者又可以點呢？長者家慈善基金尋日第二年舉行《襪襪送》活動，捐襪畀院舍長者之餘，仲安排名人赤腳行冰，感受長者喺嚴寒之下冇襪着嘅滋味。
田二少怕凍又怕跣
參與嘅新民黨副主席田北辰（田二少）、行政會議成員梁智鴻及身兼基金主席嘅元朗區議員黃卓健，都凍到「雪雪」聲。
田二少係第二次參加活動，對行冰嗰種由腳底凍上身嘅感覺記憶猶新，佢笑笑口話，愈凍就愈想行得快，但行得快又怕跣低，所以要搵到平衡點。問到會否出戰立法會超級區議會議席，田二少話要搵學者做咗民調先，但可惜班學者近日忙於做特首選舉調查，冇人理佢，亦唔想因為心急而影響民調結果，所以拖到依家都未做，但都希望可以趕及月底兩會之前完成民調。
卓妮同場又遇到活動贊助人之一嘅昌利行董事林曉盈（Juliana），其家族經營手襪生意，佢話手襪係歐美國家市民嘅必需品，佢哋經營策略係將手襪設計簡化以降低成本，又推出廉價套裝畀客戶選擇，寧願賺少啲，以保留長期客。
原來Juliana同八歲囝囝都好鍾意滑雪，之前去過加拿大同日本滑雪，但未去過韓國，嚟緊都想去玩吓喎。