中環出更：K金大王「鑽」出頭來
時下後生仔女結婚，點都要買番隻鑽戒先至夠氣派。前中西區區議會主席、外號「K金大王」嘅胡良利（萬益）珠寶老闆胡楚南日前喺鑽石總會周年晚宴上話，近年佢都睇好鑽石市場，白鑽、彩鑽、巨鑽包羅萬有，吸引唔少內地豪客幫襯，試過有客搵過千萬一粒嘅巨鑽，話買就買，眼都唔眨。
胡楚南係晚宴籌委會主席，佢喺席間大談鑽石行業前景，佢話雖然中國人鍾情玉石，但外國人唔buy，皆因鑽石認受性高，所以玉石前景始終唔及鑽石咁好。隨住中國經濟騰飛，內地人慢慢懂得鑽石、鍾意鑽石、買得起鑽石，既保值又容易進出口，深受內地買家歡迎。
鑽石有價有市，相對K金批發利潤就唔係太高，但胡楚南話其公司目前仍以K金批發為主，而鑽石生意只佔兩成。佢話，做時裝同高科技產品，賣唔出會貶值，但黃金同鑽石放喺度賣唔出，都唔會蝕咁多，佢仲笑笑口話，賺得少都好過冇得賺，冇得賺都好過畀人走數，揀客要好小心喎。
王凱曼趣談生意經
卓妮同場仲見到胡楚南新抱王凱曼（Carmen），佢擔任董事總經理後，主要負責買賣交易。Carmen話，入鑽石除咗搵猶太人之外，原來近年印度都係主要供應商，佢參觀過當地廠房，外面環境好似好落後，但原來廠內設備好先進。
佢坦言，同兩地人打交道，文化差異頗大，印度人鍾意玩拉鋸戰，傾到你攰為止，猶太人就冇價講，但講道理同守信用。
不過，Carmen同印度嘅第二代接觸，覺得對方教育程度比較高，對外接觸多咗，傾生意都易話為好多。至於內地人則似印度人，較為難纏，好彩佢自己都係內地出生，同聲同氣，乜事都易傾啲啦！