政情：陳茂波倒戈插「三超」
夕陽政府施政千瘡百孔，連一向溫文嘅會計界立法會議員陳茂波（Paul）都睇唔過眼，疑似化身會計界「長毛」喺社交網站facebook發炮，佢話前日閱報看到「三超」，不得不同大家分享，包括「超廢話」嘅新居屋補價方案、「超擦鞋」嘅評論文章及「超馬虎」嘅浸會大學民調「早洩」風波調查。
阿Paul批評，新居屋補價方案根本多此一舉，製造咗新舊業主之間嘅矛盾，但當局竟然可以講成係「優化」方案，真係「超廢話」。講到「超擦鞋」，佢就話有評論文章認為「鬍鬚曾修復力強，預算案漏洞極少」，真係廢話。至於「超馬虎」嘅浸大民調「早洩」風波調查，原來可以如此「草草了事」嘅。
對於屬於建制派嘅阿Paul連珠炮發轟政府，有網友就質疑佢係咪「轉咗會」，但阿Paul就強調自己只係實話實說喎。究竟阿Paul此舉係咪為直選鋪路，定係想幫某特首參選人助選，咁就真係佢自己先至知喇！