前晚中聯辦設宴請建制派立法會議員食飯，大部分人都畀面出席，偏偏民建聯陳鑑林（橄欖）就無蒲頭，點解咁唔畀面？原來因為橄欖身體唔舒服，要入醫院做手術，所以未能赴會，橄欖連尋日立法會大會都要請假冇去開，依家要專心休養，希望佢早日康復啦！
大部分民記中人尋日都乖乖現身立法會會議廳開會，但遲遲唔見橄欖嘅蹤影，「潮州怒漢」詹培忠爆響口話，橄欖唔舒服入咗廠，所以咪無嚟囉！於是我哋直接搵過橄欖，電話傳來佢氣若游絲嘅聲音，話自己膽囊發炎，所以要做手術切除膽囊，幸好已經無乜大礙，暫時仲要休養一下，稍後一段時間先至再亮相，總之大家可以放心。
新春期間，橄欖仲請咗記者去佢屋企團拜，見佢又煎又炸嘅賀年糕點照食，可能當時仲未覺得不適。不過橄欖做咗無膽之人後，食嘢就要小心啲喇。