政情：超級粉絲變麥記一姐
啱啱喺去年五月上任嘅香港麥當勞董事總經理黎韋詩（Randy），唔單只以年僅三十九歲之齡成為香港麥記史上最年輕一姐，原來佢細細個已經係麥記嘅忠實粉絲，仲因為咁打電話去麥記搵工，一做就超過十三年。
Randy話佢最記得七五年第一間麥記喺銅鑼灣開幕，當年佢只得三歲，媽咪經常帶佢去幫襯，仲喺嗰度搞生日會添，自此對麥記不離不棄，一直陪住佢成長。Randy九三年由加拿大畢業返港後，做過幾間大企業，但對麥記始終念念不忘，最後膽粗粗打電話去麥記搵工，當時正值麥記開拓內地市場，佢就去咗中國麥當勞做市場策劃主任，仕途一直順利，○九年更升為香港麥記副總裁。
雖然當時已進身為高層，但佢因為並非前線員工出身，所以就接受營運部門培訓，一年內隱瞞高層身份去幾間分店擔任唔同崗位，包括炸薯條、收銀、抹枱、沖咖啡等，有日佢做做吓嘢，就收到通知去新加坡做董事總經理，點知做咗半年又調返香港，呢位麥記新一姐真係任勞任怨。