政情：李嘉誠撐內地生與大師同行
汕頭大學日前史無前例舉行咗一場名為「與大師同行」嘅科學交流活動，以當今國際科研界關注嘅「生物醫學」為主題，請來八位來自美國五家常春藤大學嘅世界知名教授學者，包括九五年諾貝爾生理醫學獎得主威紹斯博士（Eric Wieschaus），同九十名從全國二十個省份篩選出來嘅高中精英學生，展開為期三日嘅零距離互動交流，參與嘅精英學生都表現得非常雀躍。
呢個別開生面嘅嘗試，係由耶魯大學終身教授兼汕頭大學校董林海帆發起，並由李嘉誠基金會出資主辦。
基金會董事周凱旋出席活動時，轉達咗主席、長實集團主席李嘉誠嘅說話，指自己雖然並非科學家，但深知科學家生涯中不免會有苦困、起伏同失望，希望學生可以透過呢項活動，得到深刻嘅領悟，從此翻開一頁又一頁嘅成功篇章，為人類提供卓越服務。
基金會仲計劃由今年開始，每年主辦一至兩次「與大師同行」，逐步擴大活動嘅影響力，進一步推動內地高校與國際間科研交流與教學發展。