政情：立會四蟲冷對加薪
立法會內務委員會明日開會討論下屆議員大幅加薪一倍至十四萬一千元，適逢尋日係討論前嘅最後一次全體大會，理應係全體議員爭取表現嘅好時機，但佢哋非但冇展示最好一面畀公眾睇，反而一早開會已經搞到唔夠法定人數，差啲再度鬧出流會鬧劇，而四個大懶蟲議員繼續我行我素，懶理議員加薪。倘若最終議員加薪建議「流產」，要怪就怪自作孽不可活。
全體議員加薪一倍嘅建議曝光後令全城關注，質疑議員大幅加薪嘅理據，正當議員加薪惹來爭議之際，部分議員嘅表現依然故我，好似加薪係天跌落嚟咁。其中最受關注嘅係立法會四大懶蟲中總代表黃宜弘、體育、演藝、文化及出版界霍震霆、金融界李國寶及鄉議局主席劉皇發，但四人有名你叫，尋日開會期間繼續我行我素，部分人更懶理外界嘅批評。
有「三點不露」外號嘅李國寶只係喺開會時現一現身，好快就唔見咗人，反而罕有地以競選辦主席嘅身份，陪同特首參選人唐英年出席中華出入口商會嘅論壇，佢有正經嘅議會職務唔做，寧願陪人出席活動，唔知市民會點睇呢？一向醉心體育工作嘅霍震霆，未知係咪朝早有活動要出席，搞到要延至下午先喺立法會出現，唔通佢記錯下晝先至開會？
黃宜弘話唔志在
至於發叔同黃宜弘就忽然表現積極，不時都喺會議廳同前廳出出入入，但發叔竟然聲稱唔知道議員傾緊加薪，而黃宜弘被問及加薪一事時，更面不紅耳不赤話自己唔志在份人工，亦唔會阻住地球轉，大家想點就點喎，完全表現出闊佬懶理嘅心態。話時話，下屆議員加薪一事已進入關鍵時刻，雖然啲功能組別議員未必志在份人工，但直選議員就食粥食飯都靠呢份糧，唔好有人搞到累街坊就好喇。