政情：中港罵戰 李宗德籲包容
新春伊始，唔少人都滿腹大計，本地甲組足球隊「和富大埔」嘅會長李宗德就計劃組織一支南亞裔球隊，希望大家透過球賽競技增進了解，以推動和諧社會。不過，對於近日中港罵戰引發嘅矛盾，就唔係組織球隊可以解決，李宗德認為大家要持包容態度，避免紛爭愈演愈烈喎。
李宗德話，中港居民各有唔同背景，有摩擦都係好平常，只要大家相互尊重，萬事都可解決。可惜喺中港矛盾日見尖銳之時，未見有德高望重嘅人出嚟居中調停，反而出現北京大學教授孔慶東之流，喺對立局面火上加油。
李宗德又話，其父母曾經歷紛亂嘅民國初年，深感只有和諧嘅環境先至有發展嘅機會，所以佢為自己間公司命名為「和富」，含有民和國富嘅意思，佢希望今次嘅紛爭盡快平息，大家和氣先至可以生財。