特首參選人唐英年經常左閃右避，到依家都唔肯同對手梁振英同場辯論，估唔到呢招「避重就輕」，佢媽媽唐尤淑圻先至係始祖。唐媽媽尋日出席仁濟醫院新春酒會時，記者第一時間上前話想同佢傾兩句，但點知佢一時手指指天花板，一時指指自己個喉嚨，話現場好嘈吵，扮聽唔到記者講嘢，唔通唐唐自細就受到唐媽媽喺呢方面嘅特訓？
唐唐出身大富之家，但竟然當眾公開除鞋「印腳」，呢啲既輕佻、又不雅嘅動作，除咗有失身份，仲畀人話佢無家教，相信大家都好想知唐媽媽當年點教仔，定係有教到，但個仔唔聽話呢？所以尋日就係想問吓唐媽媽呢方面嘅嘢，點知佢就用好微弱嘅聲線話，現場嘅咪聲太嘈，令佢聽唔到記者講嘢，又怕大聲講嘢會令喉嚨唔舒服，所以唔講住喇！
唐媽媽既然咁講，我哋惟有耐心等候靜啲嘅時候再問過啦，但到合適嘅時候，唐媽媽佢又錄音機上身，話聽唔到嘢喎。平時唐媽媽出晒名大方得體，有問必答，今次咁樣避法，相信都係愛兒心切，真係辛苦晒唐媽媽喇。