政情：五散人散散o地
天下無不「散」之筵席，那些年，立法會廠商會代表林大輝、會計界代表陳茂波（Paul）、保險界代表陳健波、資訊科技界代表譚偉豪（Samson）及醫學界代表「怪醫」梁家騮，合組立法會「五散人」，五人聯手捧民主黨劉慧卿做財務委員會主席，大顯實力。不過，近年來佢哋開始散散哋，一來大家就特首選舉各為其主，二來各自面對種種問題，能否順利過渡到下屆立法會將成為疑問。
譚偉豪連任打硬仗
五散人尋日同傳媒團拜，五人前後腳到場。講到各人去向，據聞大輝對立法會直選蠢蠢欲動，甚至傳佢有意空降選情混亂嘅新界西參選，但做過沙田區議員嘅大輝斷言，要直選都去新界東啦！但睇番現時新界東嘅戰局，即使議席有所增加，工聯會、自由黨、鄉事派、仲有新論壇嘅龐愛蘭都對新增一席虎視眈眈，大輝想落去真係談何容易。
當然大輝亦係識計數之人，佢話缺乏樁腳支撐下，好難喺直選勝出，最合情理莫過於繼續代表廠商會。不過，亦有人分析指，話唔定下屆政府畀個官大輝做都未定，所以將來佢會否再留喺立法會真係好難預料。同樣有變數嘅Samson，佢喺○八年選舉都係贏得掹掹緊，加上佢嘅勁敵、香港互聯網協會創會主席莫乃光喺呢幾年並無放軟手腳，面對呢場硬仗，勝算只係五五波。
至於「怪醫」梁家騮，尋日佢都係維持一貫作風，對競逐連任不置可否，要睇吓到時點喎。有分析話，怪醫嘅形象唔錯，若然肯選，要再贏唔係太難，問題只在於怪醫是否想選。
講到呢度，相信最後就只剩下阿Paul同陳健波，兩個人成功連任嘅機會都唔細，而陳健波就更加穩陣，佢做議員愈做愈上手，業界亦都想佢繼續留低，好過又要認識過個新人。就係咁，「五散人」呢個組合恐怕會一去不復返。