中環出更：彭徐美雲遊布吉 豪住總統套房
今年冬天凍得特別耐，唔少人選擇外遊避寒，好似女童軍香港總監彭徐美雲都趁新春與老公彭曉明及大仔彭穎生（Victor）暢遊泰國布吉，仲入住總統套房，認真豪。充電返港嘅彭太，講起布吉遊就興奮，原來自南亞海嘯後，彭家都暫時避遊泰國，今年重返布吉，入住五星級嘅SALA Resort總統套房，環境綠草如茵，吸啖空氣都清新啲。
大花園歎燒烤餐
彭太話，熱愛陽光與海灘嘅彭生，把握機會曬日光浴；Victor就陪媽咪漫步海灘，吹吹海風。入夜後，一家三口喺套房出面嘅大花園食燒烤大餐，邊欣賞海景，邊品嘗多款法國頂級佳釀，人生一樂也，所以佢話一年豪一次，幾貴都值得。
講番龍年大計，Victor正忙於打理家族生意，不過歐美經濟插水，Victor轉攻內地，佢話內地人對外國信心大啲，佢同德國公司合作生產工業安全眼罩，打着「Made in Germany」幾個字，反而更受同胞歡迎。