中環出更：愛女出閣 劉燕卿贈玉石嫁妝
龍年喜事多，唔少情侶都籌備喺今年拉埋天窗，好似消費者委員會總幹事劉燕卿（Connie）都話嫁女。卓妮日前喺一個晚宴上見到Connie，佢甜絲絲話，愛女Phoebe將於五月出閣，未來女婿都係香港人，真係可喜可賀。Connie本身好鍾意玉器，所以佢除咗會買套玉石首飾送畀愛女做嫁妝之外，仲會將一枚「家傳之寶」玉戒指傳畀愛女，希望代代相傳。
笑言自己好傳統
Connie今年十月就會離開消委會開始休假，依家囡囡搵到好歸宿，真係飲得杯落。不過，對首次做外母嘅佢就好緊張，早前親自同囡囡四出搜羅心水金器，務求愛女成為最美麗動人嘅新娘。
Connie笑笑口話，佢生於好傳統嘅家庭，到時一定要愛女跟足傳統程序着裙褂同斟茶，足金龍鳳鐲、金豬牌、金鏈當然唔少得，但最重要當然係將家傳玉戒指戴到愛女手上啦，真係溫馨。