中環出更：何倍倩恨追「小龍女」
龍B效應起，城中名人趕添丁，已有一子嘅恒生新抱兼Zensation Beaute行政總裁何倍倩（Anina）都恨追番個「小龍女」，湊夠一個「好」字，依家正努力「造人」。卓妮日前行經中環，遇見Anina食完晏返公司，佢報喜話，旗下公司喺美國比華利山嘅首間護膚品專門店，將於本月十七日正式開幕，佢已經訂晒機票同老公飛過美國剪綵。
考慮進軍BB衫生意
當新店開幕後，Anina預計不時要港、美兩地飛，佢擔心一旦懷有龍B，未必可以飛得咁密，所以心情好矛盾。不過，生番個「小龍女」的確係佢心願，近日見到著名設計師好友何國鉦推出BB女裝裙，都忍唔住買定先。龍年大旺嬰兒用品，Anina代理嘅BB護膚品牌Noodle & Boo都受惠，生意豬籠入水，今年正考慮進軍BB靚衫生意，大發龍B財。