發展局局長林鄭月娥再次企硬，話到明四月份起會重點處理新界僭建物，又重申會秉公辦事，一旦執法人員遇上不合理抗爭或人身安全威脅，佢會毫不猶豫作出譴責喎。
話時話吖，本港樓宇僭建問題嚴重，新界地區更加氾濫成災，連高官名人亦涉及其中，問題尾大不掉，歸根究柢係當局過往有法不執，執法不嚴所致，林鄭月娥素有「好打得」局長之稱，不過任內僭建問題愈演愈烈，睇嚟好打得都係有限公司啫。
都係嗰句，遲到好過冇到，講完最緊要做到。既然有法可依，當局有決心有資源，又有埋清拆時間表，何解林鄭月娥仲要煞有介事行出嚟「強調」一番，唔通有乜阻滯？原來講起嚟有段古，而且個古仔同下屆特首選舉有關。
話說其中一位參選人唐英年前排入新界同班鄉紳傾偈，講到解決丁屋僭建問題突然爆出兩個文縐縐嘅四字成語，話要「互讓互諒」、「以和為貴」喎。佢仲話呢類「所謂違規建築」有自身歷史背景，《基本法》保障原居民權益不受侵害。咁嘅口氣，似乎違規行為理所當然，依法處理反而係小題大做。唔怪得新界鄉紳近排咁，原來係被人撩起把火。
唉，仲以為唐唐忽然變得才思敏捷，原來又係妙語如豬，九唔搭八嘅「唐氏語言障礙綜合症」發作。卒之累到舊老頂煲呔曾都要開聲回應，重申僭建物就係違法，唔受《基本法》保障。唐唐無視法治不知所謂，更加畀市民鬧爆。
查實，佢下巴輕輕為新界丁屋僭建護航，亂發噏風，已經唔係第一次，舊年就成個建築師上身咁款，話丁屋可以向高空發展，起到六層甚至九層都得添。點知即時畀林鄭月娥一句「擔心引起規劃及建築安全等問題」窒番轉頭，唔衰攞嚟衰。
法律面前，人人平等，僭建即係違法，市區又好，新界也罷，都應該一視同仁，依法辦事。唐唐做高官多年，冇理由唔識，點解佢對新界僭建問題持雙重標準呢？畫公仔唔使畫出腸，咪就係為咗鄉紳手上嘅選票囉。講真，如果唔係因為鄉事勢力喺特首選舉委員會有廿幾票，佢點會咁上心吖。
為咗一己私利，罔顧法律尊嚴，漠視市民福祉，不惜製造社會分化，挑撥城鄉矛盾。連法治都可以交換，仲有乜嘢做唔出？如果咁嘅人可以做特首，香港實冇運行。
嗱嗱嗱，嘢可以亂食，選舉支票唔可以亂開，法治更不容僭建。功夫茶提醒啲無良政客，小心搬起石頭砸自己隻腳。點講都好，高官話要秉公辦事，嚴打僭建，就要講到做到，怕就怕夕陽政府等收工，留低啲蘇州屎就拍拍籮柚走人。