政情：龐愛蘭貼錢外訪考察
地區問題特別多奇難雜症，但港府官員成日抱住少做少錯嘅心態行事，令到啲地區人士好火滾。好似最近沙田區議員龐愛蘭（Scarlett）收到好多居民投訴當區嘅噪音問題，佢即時建議當局喺吐露港公路兩旁安裝隔音屏，但對方以諸多技術理由話起唔到，搞到居民冇日安寧。
Scarlett並冇就此放棄，趁上月中同家人到歐洲旅行期間，實地考察多個歐洲國家起隔音屏嘅經驗，貼錢幫政府度橋解決問題。佢盛讚人哋嘅隔音屏設計美觀兼多元化，又唔使佔用好多位置，質問「點解人哋做到我哋做唔到呢？」
Scarlett即將到澳洲升讀醫科嘅十九歲囝囝今次都有份歐遊，佢話起初囝囝對係咪適合做醫生都好擔心，遇到骨折病人亦感到好唔舒服，不過始終後生仔適應能力特強，之後睇睇吓就習慣咗，去年返港過暑假時，仲到專門醫治腸癌嘅中心做義工，除咗接電話仲要清理病人糞便，完全脫胎換骨。