政情：潘佩璆飲枇杷膏止咳
之前農曆新年期間氣溫忽然驟降，好多人都打敗仗患傷風感冒。日前我哋就喺金鐘海富中心一間藥房見到立法會勞工界議員潘佩璆，見佢埋首選購中成藥，本身係醫生嘅佢，莫非都中咗招？其實佢係去買川貝枇杷膏，因為覺得喉嚨乾涸有兩聲咳，係佢每逢遇上寒冷天氣都會出現嘅小毛病喎。
身為西醫嘅潘佩璆話，自己每當偶染微恙，都會服用中成藥，而川貝枇杷膏就係由細到大都飲開，一飲就止咳，確係好有療效，所以間中都會買番一樽嚟看門口。佢又話，以西醫角度睇，患有傷風感冒，痊愈嘅關鍵就係多啲休息，但中藥服後唔會令人昏昏欲睡，所以中藥咁多年來都廣受大眾歡迎。
潘佩璆認為，香港既有良好品質管理，又有大學培訓中醫人才，若然政府肯加以扶助，發展中醫中藥大有可為。