泛民特首參選人何俊仁（鐵頭仁）屬於無證人士，多年來唔可以自由出入內地。尋日佢出席航運交通界諮詢會時，就畀主持人寸佢如果真係當選特首，相信中央唔會唔畀佢上京述職啩？不過大家唔好唔記得，中央對香港特首係擁有實質任命權嘅，就算假設有大批選委食錯藥集體投錯票，令鐵頭仁爆大冷當選，中央都可以拒絕任命佢，令佢繼續冇得返大陸！
喺尋日嘅諮詢會上，有業界人士問鐵頭仁當選後會點樣去解決本港各邊境口岸嘅交通擠塞問題，佢直認自己冇返內地廿幾年，對各個口岸嘅發展真係一無所知，只可以攞住啲數字睇吓市民過關用咗幾多時間喎。
諮詢會主持人唔知係想鼓勵佢定寸佢，笑言：「你做到特首（中央）實畀你述職嘅！」鐵頭仁就好尷尬咁回應，話《基本法》都冇寫明特首一定可以返大陸。
鐵頭仁又喺諮詢會上多番強調，自己選唔到唔緊要，最緊要就係可以繼續為市民服務，叫啲業界多啲打電話畀民主黨，等佢喺立法會內多啲反映業界意見，睇嚟佢早已對今次選舉打定輸數。