政情：鬍鬚曾無恥 孤寒當美德
財政司司長鬍鬚曾任內五份財政預算案，都被指過分短視同保守，令香港經濟發展停滯不前，五年來為庫房估錯超過二千五百億元盈餘。尋日佢上電台節目時，竟對有關批評直認不諱，話自己係個保守嘅人，做人「一日一日睇」，唔會瞻前顧後。佢仲以名著《老人與海》中嘅老人做比喻，試圖自詡永不放棄，但實情書中嘅老人性情孤僻、不善與人溝通，幾經辛苦釣到條大魚，最後都畀鯊魚食埋，確實係鬍鬚曾嘅寫照。
呢五年嚟，鬍鬚曾嘅預算案不知傷透幾多基層市民嘅心，對於市民由希望變失望、失望變絕望，佢尋日喺電台節目中直言「我個人就係一日一日睇，唔係好多話向後望或者好大向前望」，變相自認短視冇遠見，唔識檢討過往錯失同進行長遠規劃。
對於自己成日高估開支、低估收入，畀人批評為「守財奴」，鬍鬚曾亦赤裸裸道出原委：「我係保守嘅，作為保守嘅人，對負責財政嘅人係應該嘅！」將孤寒美化為保守，鬍鬚曾真係曲都拗番直。最後連電台主持都頂佢唔順，追問佢係咪真係自覺問心無愧，鬍鬚曾斬釘截鐵咁話「絕對問心無愧」，厚顏至此真係冇得頂。
借《老人與海》比喻 大吉利是
鬍鬚曾喺另一電台節目《香港家書》中，繼續自吹自擂過往五年「功績」，並以海明威嘅諾貝爾文學獎名著《老人與海》作結，話今年佢寫預算案前，好快咁重讀咗呢本書，覺得書中嘅老人喺大海同大魚搏鬥，就算筋疲力盡、畀鯊魚襲擊仍然永不放棄，相信港人本住呢份精神亦可以邁步向前。
其實以今天社會嘅眼光，書中老人堪稱隱蔽長者嘅典範，孤獨、不善溝通，成日發白日夢及同海鳥傾偈，最後連海鳥都離棄佢。老人幾經辛苦釣到條大魚，最後更畀啲鯊魚食晒，失敗收場，僅自覺喺精神上勝利。用呢個故事同角色嚟形容香港人，就真係大吉利是，用嚟比喻死唔知錯、畀全城鬧爆仲自覺做得好好嘅鬍鬚曾，就認真貼切！