中環出更：陳晴湊B 回京度歲探親
聯合國兒童基金香港委員會主席陳晴（Judy）有子萬事足，一歲大嘅囝囝Julius牙牙學語。佢趁住農曆年新春假期，首次帶B仔上北京度歲，更大放煙花、炮仗，認真開心。不過，相信點開心都唔及外公、前國務院港澳辦副主任陳佐洱咁開心，梗係啦，見到孫仔喎！
穿起「夏姿」出品棉襖嘅Judy，日前出席會展一個新春酒會時，一講起湊仔就甜笑。佢話，上京過節最難忘，囝囝眼仔睩睩望住大人放煙花、炮仗，竟然唔驚又唔喊。難得與北京親友享天倫，Judy冒寒捲起衫袖包餃子，最捧場嘅竟然係囝囝，逐少逐少咁食，津津有味。
八個月大曉行叫媽媽
Judy湊仔咁happy，唔知會否追多一名「小龍女」呢？佢就擰晒頭話：「唔好嘞，抖抖先！」佢話，囝囝領悟力強，八個月大識叫媽媽，近日仲學曉行路，聽落認真有神童嘅特質。為栽培囝囝，佢索性提早安排囝囝讀playgroup，望子成龍，Judy果然有一套喎。
卓妮