中環出更：梅州聯會團拜歎客家美食

余鵬春推介「發糕」「撈起」

講到賀年美食，余鵬春話必食「發糕」同豬肉丸，分別寓意「發大財」同「團圓」喎。本身喺印尼出生嘅佢，仲叫太太煮一味顏色鮮艷嘅東南亞美食「撈起」，材料有魚生、蘿蔔絲、沙田柚、花生等，食嘅時候用筷子夾起撈勻，寓意撈到風生水起，健康得嚟又夠晒意頭。

梁亮勝夫婦跳舞修身

余鵬春仲話，梅州有六縣一區一市，共有超過三百種獨特嘅風味小食，好似聞名中港兩地嘅客家鹽焗雞、釀豆腐，聯會今年會落力將呢啲美食分段推廣畀香港市民，等大家對客家飲食文化有更多了解。今個農曆新年佢哋選擇留港度歲，皆因喺澳洲工作嘅囝囝返咗香港，一家團圓最開心。

「撈起」寓意撈到風生水起。	「發糕」寓意食咗「發大財」。	梁亮勝（左）同太太愛食梅菜扣肉。（潘翠華攝）

卓妮仲遇到余鵬春兄長、裕華國貨董事長總經理余國春及太太余游素子，以及嘉應商會會長梁亮勝及太太梁古爾夫雙雙拍住拖到場。梁生兩夫婦都係梅縣人，佢哋話飯桌上唔少得梅菜扣肉呢道開胃菜。雖然扣肉聽落好似好肥膩，但見佢哋嘅身材fit到漏，原來秘訣係跳多啲社交舞修身。余國春就話，開年飯要食「髮菜炆蠔豉」，梗係啦，做生意最緊要「發財好市」嘛！

卓妮