鬍鬚曾做咗五年財爺，年年預算案必估錯數，平均每年估錯六百二十六億，佢狡辯係恪守「財政紀律」，又話係量入為出留下健康帳目畀下屆。老狗變不出新把戲，年年狼來了，預計新財政年度會出現三十四億元赤字，大家不妨當佢發噏風！
「派糖年年只相似，預算何曾有新意」，本報《正論》十四個字，批咗佢呢份工好易做，將啲「糖」派來派去，一係「朝三暮四」，一係「朝四暮三」，床底下打拳，起手高極有限，臨散水先「放水」益吓啲中產，力度又唔夠，年年呻到樹葉落嘅中產，今趟初嘗一啲啲「甜頭」，真係開心到彈起？之不過，散水預算案又係冷對Ｎ無人士，寬免佢哋全無份，對窮人刻薄，依然係佢嘅本色！
其實，鬍鬚曾財技止乎派糖就係大家嘅共識，「官富民窮」係夕陽政府洗唔甩嘅恥印，好心佢唔好咁大言不慚，又話任內五年，政府開支增長近七成，沒任何政府做到！又話接任財爺一職，一直全力以赴，更拋出希臘三大悲劇大師之一歐里庇得斯嘅名句：「只要問心無愧，何懼人生的艱難困頓。」嘩，明明係隻被玻璃罩住嘅蒼蠅，睇到出路，無奈點逆戰都係撼頭埋罩，有幾叻啊？
夕陽政府，散水都不忘吹水，佢真兄弟煲呔曾就喺瑞士達沃斯世界經濟論壇上口出狂言，話可以理順歐債危機！鬍鬚曾秉承大佬好吹之道，臨散水秋波那一轉，轉不出「十個鬍子九個騷」，死要玩「三碗不過崗」，厚着臉問心無愧，武大郎扮打虎，不怕有危？