探射燈：躁客遷怒 無辜車長啞忍
巴士車長不足，導致班次脫班嚴重，除了乘客一肚氣外，車長亦隨時成為出氣袋。雖然事件觸發點並非該車長做錯，但有車長表示，遇到「等到忟」的惡乘客粗言辱罵，因無路可走，只敢怒，不敢言，即使被打，亦只能報警處理。
攔路狂毆 困司機位冇路走
去年九月底，一名乘客不滿接連有兩班巴士因人滿而飛站，當第三班車駛至時，竟衝出馬路攔阻巴士，又狂打車長三拳，警員到場將乘客拘捕。去年三月，亦有一名乘客不滿巴士飛站衝出馬路，阻止巴士行駛。有車長直言，遇上乘客滿腔怒火指罵，都會「扮睇唔到」及忍氣吞聲，敢怒不敢言，他說：「邊敢出聲話番啲乘客，你知啦，佢哋等車等到一肚火，我仲多口嘅話，隨時畀佢哋打，最慘嘅係，我哋坐喺司機位，邊有路可以走！」
