政情：余永賢參選特首答問惹笑
日前預告會參加特首選舉嘅香港科技協進會前副會長余永賢，尋日宣布參選，相信大家都想知佢有乜過人之處。余教授講政綱時仍有板有眼，但到答問環節時，佢就好似棟篤笑上身，期間最少兩次喺答問題前高音「Oh！」一聲，相當生鬼。當問及競選辦主席是否在場時，佢突然指住旁邊嘅女主持人，搞到該名主持人尷尬澄清自己只係義工。
參選特首當然不能迴避政治問題，八九年六四事件自然係首選。余教授被問及是否須平反六四時，佢話當時中國採取果斷行動係正確嘅，但語音未落又突然話遺憾嘅係冇水炮同橡膠子彈喎，講講吓仲宣稱美國已經歧視咗中國一百年，到咗最近先得到平反，又話當年英國賣鴉片，一百年都未平反啦！
按照余教授嘅邏輯，有記者即時追問係咪二○八九年先可以平反六四，余教授唔知係咪自知講錯嘢話唔係，強調平反始終要較長時間喎。唔知大家聽完余教授咁講，值唔值得支持呢？