政情：項明生獻計化解仇內
中港兩地市民矛盾日深，有本港網民以「蝗蟲」貶稱內地遊客，甚至組成「唱蝗團」令內地客難堪。十幾歲由四川移民來港嘅Sony Computer Entertainment香港分公司董事項明生（James）認為，旅發局應該印製小冊子教育遊客，列明喺香港乜嘢做得、乜嘢唔做得，幫遊客入鄉隨俗，咁就可以減少兩地市民嘅紛爭。
出小冊子教規矩
James遊蹤遍布全世界，最明白遊客嘅處境。佢諗起廿幾年前去英國時，入境前獲發一份小冊子，內裏列明喺當地可以「Do」及「Do Not」事項，佢仲好用心咁背熟佢，費事令當地人反感。例如搭扶手電梯嘅規矩，當時香港仲未興起企埋右邊，但英國人已有呢個習慣，作為遊客咪要跟番人哋嘅生活秩序囉！
James又話，如果佢嘅親友來港玩，就會教佢哋唔好喺港鐵食嘢、唔好隨意踎喺街邊或商場，親友都好明白呢啲喺內地做得嘅嘢，喺香港就千祈咪做喇！