政情：立會開快車 清理蘇州屎
夕陽政府尚餘唔夠五個月任期，但未做嘅蘇州屎就仲有一籮籮，當中最棘手嘅包括商界喊打嘅《競爭法》及禁止立法會議員辭職後再參選嘅「出缺機制」，避免夜長夢多，呢兩項敏感法案都唔能夠留畀下屆政府處理，所以要開夜車趕及六月底換屆前提交立法會審議及通過。其實議員喺暑假前已經要通過大量法案，如今仲要提早一個月趕喺政府換屆前搞掂埋上述兩條法案，真係陪官員唔瞓都唔掂。
競爭法出缺機制最惡啃
首先講商務及經濟發展局局長蘇錦樑（Greg）主理嘅《競爭法》，其實已經講咗好多年都得唔到共識，雖然政府早前已經「跪低」應議員要求大規模修改，但又畀人話法例變成冇牙老虎，多個黨派仲表明對支持《競爭法》有保留添。Greg蘇之前拍晒心口話喺任期內一定要通過法案，雖然最終都迫使部分政黨屈服，但擺上立法會審議時一定會遇到阻力，就算通過到都好，睇怕Greg蘇都唔死一身潺。
另外一個就係由政制及內地事務局局長譚志源（Raymond）負責嘅禁止立法會議員喺主動辭職後六個月內再參選嘅出缺機制。前身係「替補機制」嘅出缺安排一出台就惹來全城怒吼，去年七．一仲引發超過廿二萬人上街，嚇到政府即刻龜縮話要搞諮詢。諮詢幾個月前已經做完，但政府前日先將呢個法案交畀立法會審議，加埋排期分分鐘要搞幾個月先可以三讀通過。雖然新上任嘅Raymond將個方案改頭換面，但可以順利通過就真係有啲難度。
呢個苟延殘喘嘅夕陽政府任內成日冇嗰樣整嗰樣，又經常因為漏招而要修修補補，做錯嘢都唔緊要，最弊仲要歎慢板，搞好多法案唔急都唔攞上立法會審議及通過，依家臨收工都仲要班公務員、甚至立法會議員陪佢哋一齊加班開夜車，真係害人不淺。