中環出更：鄧太慶新春 歎雲南「餌塊」
農曆新年應節食品不外乎年糕、蘿蔔糕，食得多都有啲悶。不過，太子珠寶鐘錶主席鄧鉅明（Jimmy）就好有口福喇，事關佢太太鄧宣宏雁（Emily）係雲南靚女，今個春節屋企有鹹甜皆宜嘅雲南民俗小吃「餌塊」供應。Emily講起炮製「餌塊」嘅招式頭頭是道，聽到卓妮都流晒口水。
母帶家鄉特產來港度歲
卓妮日前喺一個活動上見到Jimmy夫婦同細仔，一家三口喜氣洋洋。今年Emily嘅媽媽由雲南來港度歲，所以帶咗家鄉特有嘅「餌塊」嚟應節。「餌塊」係用煮熟嘅大米壓成塊狀，本身冇味道，所以Emily鍾意加入金華火腿、豆苗及辣酸菜一齊炒，十分惹味。如果想轉換口味，又可以加入紅棗，煮到變糖水，認真百變。
講到公司業務，原來Emily上月初正式出任太子珠寶鐘錶執董，至今已有一個月。Emily話，朝朝跟老公一齊返公司，學習點樣管理好間公司、同鐘錶品牌代表溝通，得閒仲要熟讀每個牌子背後嘅故事，十足返學咁樣，仲話喺老公身上學到好多嘢添。