中環出更：一哥變財神 闖名店派利是
春節氣氛仲未過，打工仔最開心莫過於逗利是。尋日下午約四點鐘，以炮製「阿一鮑魚」享譽全球嘅富臨飯店老闆楊貫一（一哥），西裝骨骨現身中環畢打街中建大廈Audemars Piguet愛彼錶專賣店，但佢唔係去買靚錶，而係專程去向一眾售貨員派利是。卓妮見佢掏出一大疊利是係咁派，人人有份，十足豪氣財神咁疏爽，氹到大家笑逐顏開。
一哥派完利是後，施施然坐喺店內與售貨員閒聊，大家有講有笑，相信係該店嘅熟客。大約十分鐘後，一哥起身離開，錶店職員仲陪佢出去叫的士添，服務一流。卓妮上前同一哥打招呼，佢話今次純粹嚟派利是畀班售貨員，唔係嚟買錶喎。講講吓，佢展示戴緊嘅一隻銀色AP鋼錶，原來係早幾個月前先至買嘅，佢話好鍾意AP呢個牌子，已經幫襯多年。
冷對預算案 「都係咁上下」
講起過農曆新年，一哥話新年期間好忙碌，搞到冇時間出埠玩吓。咁又係，一哥整嘅鮑魚咁出名，富臨飯店一早已成為內地遊客來港熱捧嘅食肆之一，內地客夠晒豪氣，一圍枱閒閒哋消費十萬、八萬，一哥更加要加班睇實啲啦！問到財政預算案有冇幫到佢哋飲食界，一哥淡然話：「都係咁上下啦！我都係唔方便講咁多喇！」跟住就上的士離開。
卓妮