香港電台為慶祝今年奪得亞太廣播聯盟機械人大賽嘅主辦權，特登喺美國搵咗一個七呎高嘅機械人出席團拜助興，仲由秘密通道行出嚟。不過，主禮嘅商務及經濟發展局局長蘇錦樑（Greg）就要自己行上台，佢致詞時好似呷醋咁話，自己出場都無鄧忍光處長咁有氣勢，就連機械人都有特別通道進出，但佢就要自己走上台。
Greg蘇呻完，即惹來哄堂大笑，除咗呢個笑位外，唔知Greg蘇係咪搞經濟發展搞到上晒腦，最後仲祝港台以及廣播業界廣告收入創佳績，但港台作為公共廣播機構，又點會有份收廣告呢？唔通佢同鄧處長上任時一樣，分唔清港台同商台？
講開又講，今年港台嘅開工利是由過往兩蚊加到十蚊，就連節目製作人員工會主席麥麗貞都話，今年封利是「擲地無聲」。莫非佢擔心港台編輯自主好似封利是咁變到「擲地無聲」？