政情：胡志偉男人50終上位
作為民主黨第二梯隊嘅黃大仙區議員胡志偉，每屆區議會選舉都高票當選，可惜多年來喺政圈只係浮浮沉沉，未能與黨友李華明（肥仔明）雙雙進身立法會。不過，據講肥仔明已經決定唔選九月立法會，而佢嘅愛將李耀基，自去年底輸咗區選之後就好似意志消沉，據講仲失戀添，因而令胡志偉唔使爭就可以喺九龍東名單排頭位出選，意味入硬立法會。
有政界中人透露，同樣係白鴿黨嘅黃大仙區議員黃國桐好可能排喺胡志偉參選名單嘅第二位，憑藉兩人喺黃大仙嘅實力，加上有另一樁腳沈運華以及肥仔明喺觀塘區嘅票源，相信終可令胡志偉順利進身立法會，估唔到佢要踏入知天命之年先至行運上位。至於唔選嘅肥仔明，據聞佢初步打算開番間公關公司搵真銀。