政情：王國興過海打鄉情牌
我哋早前講過，福建幫喺嚟緊九月立法會選舉唔再幫人抬轎，積極準備派員爭奪港島區議席，甚至連貴為福建人嘅民政事務局副局長許曉暉都成為考慮之列，令已轉戰港島區嘅工聯會王國興面臨硬仗。王國興尋日同拍檔潘佩璆向傳媒拜年，順便推銷工作報告，點知份報告發現興哥嘅身世之謎，原來佢都係福建人，莫非佢想福建幫讓路？
工聯會今年準備行「風車」戰陣似乎已成既定事實，興哥尋日仲怕醜話參選去向尚待工聯會拍板，但佢亦不諱言自己喺港島區嘅人事、網絡、朋友都比較熟，尤其係同福建幫亦早有淵源，事關佢自己係福建漳州人，反而潘佩璆只能算係半個福建人。
究竟福建幫受唔受興哥呢套，大家要拭目以待喇。話時話，興哥尋日心情勁靚，莫非福建幫已首肯讓路畀佢？