政情：盧文端心裏沒民記？
特首選戰如箭在弦，但好多選委仍舉棋不定，未決定支持邊個參選人，好似民建聯（民記）就仲未決定。不過，民記監委會副主席、特首政協界別選委「票王」盧文端尋日就話，佢已經決定咗會提名唐英年，仲連提名表格都簽埋添！咦，民記唔係星期五先至開會商量提名意向嘅咩，點解盧文端可以搶閘表態？有冇問題o架？
點知盧文端就反問：「係咩？我係民建聯呀？哎呀……監委咪即係『茄哩啡』！」佢話只知自己係福建社團永遠名譽會長，又話「成日唔覺得我係民建聯」，講到咁坦白，相信佢唔當自己係民記，多過唔記得自己係民記。佢仲話，提名唐唐，都係因為聽完契女伏明霞嘅老公、前財爺梁錦松嘅游說同分析，覺得好有道理喎。
盧文端話聽阿松講完之後，佢就被女婿、廠商會副會長吳永嘉要求佢幫唐唐簽提名表格，但佢一時唔記得自己係民記領導層，咁就簽咗喇。就連民記陳克勤都聽到一頭霧水，質疑盧文端無理由唔記得自己係民記，叫記者問清楚盧文端喎！連自己人都咁講，盧文端真係要再向民記解釋吓至得嘞。