政情：長者兩蚊搭車煲呔曾老點

去年十月施政報告公布長者兩蚊優惠搭港鐵同巴士計劃，一眾長者等到頸都長都未見有乜進展，有立法會議員亦加入戰團催逼當局盡快交功課，未知煲呔曾為咗應付議員定係有其他原因，口輕輕喺立法會答問大會上突然話爭取喺換屆之前落實長者乘車津貼。就係佢呢個預告，令到好多長者重燃希望，尋日仲有區議員同長者去請願，要求小巴納入優惠計劃內。

未到年底都搞唔掂

正當大家滿懷希望之際，有知情人士聽到後即時踢爆話，就算做到氣咳都趕唔到六月三十日前落實，因為計劃涉及好多複雜嘅技術問題，加上就算趕及喺換屆前公布計劃詳情，亦要向立法會財務委員會申請撥款，落實嘅時間表相信最快喺今年下半年，甚至係年底先至得。我哋翻查資料，勞工及福利局局長張建宗喺去年底講過只係爭取計劃喺今年下半年實施，根本同煲呔曾嘅承諾係兩碼子嘅事。

煲呔曾亂噏，可能參與嘅交通機構好似港鐵、九巴、新巴、城巴、新渡輪、八達通卡公司就無你咁好氣，佢哋異口同聲話未知政府個計劃嘅最新細節安排，亦唔知具體幾時推行，只係話會配合政府。其中新渡輪仲話只係去年十一月同政府開過一次會咁大把！立法會福利事務委員會委員李卓人都擔心計劃「凍過水」，搞唔掂又會推落下屆政府，計劃到時真係遙遙無期。

又難怪阿人咁擔心，事關連勞工及福利局發言人都話，目標係上半年敲定計劃嘅具體安排同細節，下半年可以盡早推出優惠。大家有冇聽到，佢話係「下半年」，即係冇可能喺煲呔曾離任前實施啦！