中環出更：中大新春團拜萬眾一「千」
踏入龍年，大學院校新春團拜車輪轉，尋日中文大學校長沈祖堯就率領一眾副校長、學院院長喺校內文化展覽館同傳媒拜年，個個都着上唐裝衫應節，仲一人掏出一封大利是，以為係派畀記者啦，原來係表錯情。
政府派錢 沈祖堯勸捐
沈祖堯話，政府人人派錢六千元，認為中大上下應該好好利用呢筆錢，所以就發起「中大人‧愛中大‧萬眾一千」活動，呼籲師生捐出其中一千元畀中大I-Care學生服務計劃，協助推行學生輔導同義務服務。身為中大高層，梗係要身先士卒啦，各位副校長、院長個個乖乖地奉上大利是。
除咗出錢外，沈祖堯仲出心出力氹學生，不但即席揮毫寫揮春送畀學生，仲落手落腳教學生寫大字，唔少國際學生見到呢個中國傳統，都主動走埋去學番兩招，同校長打成一片。
卓妮