中環出更：莊學山進取型勉港商「往外跑」

逾百位「潮州冷」富商，尋日雲集潮州商會會所團拜，潮州商會會長陳幼南率領一眾副會長張成雄、廖鐵城、胡劍江等恭賀一番，潮屬社團總會主席許學之、立法會議員梁劉柔芬、康泰旅行社太子爺黃進達都有去湊熱鬧。

「家己冷」齊睇好後市

龍年市況反覆，被視為最難測嘅一年，到底富豪點部署呢？有「深圳王」稱號嘅全國政協委員黃楚標話，買中國股票唔差得去邊，首選係內銀股。陳幼南就鍾情「買磚頭」，理由係美國聯儲局將維持低息政策至二○一四年，香港樓市應該有運行，趁調整不妨吸納優質盤自用喎。

黃楚標（左）與梁劉柔芬老友到極，更笑稱對方係「女朋友」，認真搞鬼。	陳幼南（右）與許學之齊祝願香港經濟如龍騰起舞。	黃進達希望龍年求婚成功，明年派利是畀大家。

恒指兔年尾發力向前衝，觀塘區議會主席陳振彬都繼續睇好，佢預測港股只會大漲小回，不妨吸納高息公用股，總比存錢喺銀行划算。

不過，歐債「炸彈」未除，大家係咪開心得太早？莊學山就以一個「難」字形容今年營商環境，寄語商家多動腦筋，求變求創新。

莊學山話，日本及歐洲人早已明白坐以待斃唔係解決經濟問題嘅辦法，大膽輸出科技及人才，連以往從不外流嘅高科技都「往外跑」。所謂亂世出英雄，只要香港人肯放眼世界，絕處都會逢生喎。

卓妮