《水滸傳》梁山泊一百零八條好漢嘅英雄故事，相信大家聽過唔少。原來，昔日水泊作亂、落草為寇嘅類似情節，今日一樣日日喺神州大地上演喎，而且，地點就喺香港隔籬嘅廣東省。
即係咁，內地貪官橫行，尤其有汕尾狗官一族欺壓百姓，替天行道嘅梁山好漢的確令人引頸以待，但好可惜，逼上梁山嘅現代混江龍並非乜嘢英雄豪傑，而係一班山寨版索馬里海盜，統稱河盜。
廣東河道多河盜，點多法？嗱，番禺有、中山有、順德有，幾乎成個珠三角水域都係盜賊天堂，搞到內地船員談盜色變。最近之嘛，就有內地來港貨船相繼遇劫，水滸入面嘅「鼓上蚤」時遷專長雞鳴狗盜，呢班廣東河盜有過之而無不及，聯群結隊以快艇搶掠柴油同備用電池等貴重物品，有時甚至上船犯案，以菜刀、斧頭指嚇船員，簡直無法無天。
廣東河盜猖獗，不能不令功夫茶憂心忡忡，一來當然唔想見到內地船員出事，二來咯喎，原來香港人一樣受到威脅。粵港船運業人士指出，本港現時有數百艘貨船行走珠三角內河水域，貨船遇劫已經係司空見慣咁話。嘩，劫船搞到好似搭船咁隨便，咁仲成世界嘅！
嗱嗱嗱，光天化日之下河盜為非作歹，珠三角水域成為現代版梁山泊山寨，說明乜嘢現象呢？功夫茶會第一時間諗到：內地政府打擊不力！唔係咩？內地官僚欺壓人民霸氣凌人，驅趕迫遷戶、無牌小販兇神惡煞，但係講到對付河盜咯喎，咁威武嘅形象何曾出現過先？
嗱，內地當局打擊河盜懶懶閒，有例證㗎！內地船員梁女士兩度喺番禺附近水域遇劫，金錢損失唔在講，雙腳仲被割傷，事後打電話報警，以為即刻有人匡扶正義啦，哈，點知只係聽到接線人員淡淡一句「幫你落案」，根本無人跟進，到底係驚咗強盜，定係官盜一家呀？
講到呢度，各位港產官僚如果仲稍有少少正義感，係咪應該挺身而出，催逼廣東省嚴打河盜呢？話晒關乎香港船員嘅財產生命安全咯喎！同內地商討阻截內地孕婦湧港產子，你哋就話老鼠拉烏龜無從入手啫，叫廣東省做好份工，打擊河盜，唔難開口嘞啩！
咁啦，如果港產官僚思想遲鈍，唔識點同廣東省講，等功夫茶教埋你吖：上年底湄公河血案震驚國人，十二名中國公民被害、一人下落不明嘅慘劇歷歷在目，無人想見慘劇重演，更加唔想珠三角水域變成河盜橫行嘅湄公河，唔該內地當局快快清理河盜！
話時話，廣東省咪打着幸福廣東口號嘅，但係船員被河盜搞到擔驚受怕，坐臥不寧，何來幸福可言呢？古人逼上梁山，聚眾作亂。今日廣東省走投無路走上盜賊之路嘅人不計其數，唔係路霸、土匪，就係河盜，睇嚟內地當局為人為己，都應該快快嚴打，如果唔係，幸福廣東塊宣傳招牌只會淪為欺世盜名嘅咋。