煲呔曾縮骨治港七年，如果話佢一事無成似乎唔係幾「公道」。夕陽政府臨收工，社會深層次矛盾益發尖銳，尤其內地孕婦湧港產子，政府無能，保障唔到港人權益，由此衍生的問題益發尖銳，未來政府有排頭痕！
冇錯，社會民生煲呔曾固然無心無力，住喺「禮賓府」嘅佢，視香港為天地之逆旅，擺到明係「過客」心態，唔識做「孖士打」，香港只好如怒海漂舟，任其浮沉，終搞成今日之亂局。搞風搞雨，確係有一手！
縮骨到最後一分鐘嘅煲呔曾，為咗趕在「門常開」讀佢嘅最後一份施政報告，及招呼北大人剪綵攞威，急不及待要搬入去「空心煞」嘅添馬艦政府總部，搞出個驚慄格局，一個「無心無肺」，一個「無胸無後」，呢劑可以話係創意無限大大鑊。
自本報早前獨家揭發立法會淪為「毒氣室」後，高官輪流放假，公務員人人自危，立法會議員轟政府靠害。造價逾五十億元嘅新政府總部大樓搞到聚天地之穢氣，散最毒之惡菌，原本透明無味嘅空氣竟然生出不少顏色，叫啲議員不能有態度地呼吸，煲呔曾一出手，果然威過神仙放屁！
之不過惡菌無眼，唔搵縮骨嘅煲呔曾「祭旗」，卻搵晚晚要洗肚、為教育奮鬥到最後一分一秒嘅教育局局長孫公來「祭旗」，天地不仁，又添一例。
煲呔曾臨收山，如果佢真係想貢獻社會，以佢百毒不侵，惡菌都行歪，老朽誠心遞支筆畀佢：臨走麻煩填一填呢張器官捐贈卡！阿門！