政情：工黨遊行外傭「騎劫」
工黨尋日搞遊行，提出對後日財政預算案嘅訴求。個遊行原本計劃係一百人左右，點知嚟咗成差唔多三百人，但半數都係外傭，搞到場面好尷尬。班外傭遊行嗰陣猛嗌「加人工、加人工」，完全唔係工黨本身訴求，而啲聲仲蓋過晒工黨主席李卓人等嘅口號，搞到阿人唔知嗌唔嗌好。可能啲外傭見到工黨嘅旗幟，就順理成章諗住一定會幫佢哋爭取加人工喇。
前排電視劇《天與地》紅爆，有人就話戲入面由林保怡飾演嘅鼓佬搞社運，其實係抄李卓人嘅身世，李卓人雖然話自己無追開《天與地》，又話無好似戲中嘅鼓佬咁食人，不過佢尋日真係鼓佬上身，話眼見大家唱得咁開心，同黨員張超雄、張國柱送番首插曲《年少無知》畀大家咁話！雖然拎住貓紙，又唱到甩甩哋歌詞，但係可能仍有電視迷仲好掛住鼓佬，阿人唱歌，頂住檔先啦。