政情：離島鄉紳唔睇發叔台戲

對準槍頭 無聲控訴

其實《東方日報》之前已經報道過，今次杯葛行動嘅導火線，源自長洲鄉事委員會主席翁志明喺去年嘅特首選委會選舉中失利，離島鄉紳感到被人出賣，矛頭直指劉皇發，結果致函鄉議局，講明會杯葛今次團拜。尋日八位鄉委會主席中，大部分都冇出席，好明顯就係一眾離島鄉委會主席對鄉議局所作嘅無聲控訴。

離島區議會消息人士話，今次咁大件事，其實係「冰封三尺、非一日之寒」，離島區議會主席周玉堂早前經協調後順利連任，擊退咗好想做主席嘅離島委任區議員余漢坤，佢事後為保友好關係，提名余漢坤做區議會地區設施管理委員會主席，點知後來喺其他鄉紳壓力下，自己又走出嚟同余漢坤競選，今次由余漢坤擊退咗周玉堂，一眾鄉紳即拍枱離場以示不滿。

因余漢坤係劉皇發嘅女婿，結果呢單嘢又入晒發叔數，股怨氣延伸到尋日，所以咪齊齊玩杯葛囉。唔止咁呀，早排鄉議局開內部會議討論鄉委會選舉規範化安排，離島鄉紳唔多滿意要受規管，會上極之唔客氣咁力斥發叔嘅得力幫手、鄉議局副主席張學明，張學明為免傷和氣，只微笑以對，但對方唔肯罷休，大聲話：「你笑咩呀？唔好笑呀！」

離島一眾鄉紳平時都好隨和，今次玩到咁激，好多鄉議局中人都話件事唔係咁簡單。坊間有傳，一位擁有專業人士背景、同發叔又不咬弦嘅建制派人士同呢班鄉紳互相支持，嚟緊大有機會喺新界西出選立法會，如消息屬實，到時就要剝定花生等睇戲喇。