是日初七，人人生日，祝大家生日快樂。對於中國人嚟講，傳宗接代係人生大事，生日當然好重要，正如孟夫子話齋，不孝有三，無後為大。但好可惜，今時今日就算有心「造人」，都唔係咁容易嘅咋。
近年內地孕婦紛紛湧落嚟生仔，搞到「雙非」問題日益惡化，今年係龍年，場面可能更墟冚。但唔講唔知，原來港婦北上追「龍種」，情況一樣咁誇張。有深圳醫院嘅生殖醫學中心求診病人，港人居然佔咗兩成有多，數字仲不斷飆升緊添，估唔到呢！
所謂生殖醫學中心，主要係為夫婦解決不育問題，包括人工受孕。不過咁喎，內地醫療醜聞無日無之，醫療質素備受質疑，北上造人穩唔穩陣㗎？穩唔穩陣好難講，港婦之所以北上造人，都係迫不得已嘅咋。冇計喇，喺本港公立醫院輪候人工受孕服務，由入紙申請到接受治療，閒閒地都要等三、四年，等得嚟都超晒齡喇。去私家醫院？郁吓十幾萬，幾多人負擔得起吖。
講起真係無奈，香港人生活壓力大，遲婚情況普遍，婦女生育年齡愈來愈大，唔少夫婦受到不育問題困擾。官方資料顯示，○九年有四千九百幾人接受人工受孕，二○一○年數字急升近倍，去到八千六百幾人。最弊係需求節節飆升，服務就原地踏步，醫管局轄下三間提供有關服務嘅公立醫院，每年加埋只可以處理一千三百幾宗個案咁大把，僅可以滿足一成幾服務需求。試諗吓，高齡不育夫婦根本冇可能再等幾年，如果想生育，除咗冒險北上求助，仲可以點做呢？
其實，遲婚普遍、生育年齡偏高等現象唔係今日至有，弊在港府闊佬懶理，淨係得把口鼓勵生育，但就乜都唔做，連人工受孕服務名額都唔肯增加，搞到港人要北上造人，除咗面對風險，分分鐘仲會誤墮不良中介嘅陷阱，隨時人財兩空。
講到尾，問題根源就係港府孤寒成性，麻木不仁，一味顧住推動所謂醫療產業搵大錢，對公營醫療資源短缺、百病叢生視而不見。呢，瑪麗醫院殘殘舊舊，設備落後，被港大學者形容為「第三世界都不如」，當局遲遲唔肯撥款重建，反而為起私家醫院預留土地，你話係咪九唔搭八？仲有吖，當局只睇到內地孕婦湧港產子帶來嘅經濟利益，但對公院產房逼爆，本地孕婦生仔冇床位嘅苦況就闊佬懶理。至於公立醫院醫護人員不斷流失，更加關人個關。
唉，港府窮到只剩下錢，但就懶理基層市民缺醫少藥嘅困境，簡直缺德無良兼混帳！