龍年伊始，除咗年初二維港煙花匯演外，國務院僑務辦公室亦派出七支藝術團組來港表演，將於周二（三十一日）喺灣仔會展演出。來港表演嘅嘉賓個個分量十足，當中包括著名歌唱家、解放軍海軍政治部文工團副團長宋祖英，仲有維吾爾族青年音樂家艾爾肯、藏族青年歌唱家阿旺等，勢必帶來高質素嘅視聽娛樂畀大家。
如果大家記得嘅話，去年中河南濮陽市搞咗場大型紅歌活動，同樣邀請咗宋祖英表演，期間有一名中年男子突然衝上台，擺出各樣姿勢要求宋合照，更一手摟住宋的肩膀，停留咗好幾秒，但當時宋表現得好鎮定，保持微笑如常唱歌，唔知今次佢來港會否加強場地保安呢？
國務院僑辦並非首年舉辦同類活動，其實佢哋自○九年至今已累計派出廿個藝術團組，喺全球廿一個國家和港澳地區演出一百卅九場，觀眾人次已逾一百七十五萬。有份負責籌辦今次活動嘅僑界社團聯會會長余國春估計晚會將有近萬人入場，而入場券已全部免費派晒，真係一票難求喎！