政情：侯志強話單手打贏唐唐
上水鄉事委員會主席侯志強早前出庭頂證「食力簡」簡炳墀賄選，加上佢喺特首選委會選舉鄉議局界別中勝出，即時令其知名度大增。同食力簡一樣咁牙擦嘅佢話，如果同玩開自由搏擊幾年嘅特首參選人唐英年（唐唐）講手嘅話，單手就可以搞掂對方喎。
本身係唐唐支持者嘅侯志強尋日同傳媒拜年時話，自細就好百厭，成日畀鄰居投訴，所以不時會畀阿爸吊起嚟打，加上成日通山走，因而鍛煉出一副壯健嘅身體，閒閒哋幾個人埋身都未驚過。佢仲話，年輕時食過夜粥，先後學過詠春、洪拳同自由搏擊，依家仲打得吓架。
講起搏擊，自然令人想起唐唐日前喺鏡頭前扮玩自由搏擊嘅醜態，出拳相當弱雞。侯志強笑笑口話，如果真係同唐唐玩格鬥，單手都可以打贏對方，即使自己支持對方都係咁話。佢又提到，遲啲會籌款重建上水鄉委會會址，現時仍考慮緊係咪拆咗招牌旁邊「簡炳墀題」幾個字，但現時未有定案。