政情：橄欖抱完兔孫抱龍孫
龍年新正頭拜年浪接浪，尋日輪到立法會議員陳鑑林（橄欖），佢依舊邀請傳媒去佢沙田十二笏村屋大宅拜年，點知一踏入屋已聞喜訊，原來橄欖愛女懷有龍B，預產期估計喺今年年中。
其實橄欖嘅大仔同新抱已喺去年一索得男，令佢首度榮升爺爺抱孫，之後佢愛女同細仔亦分別結婚，一年內喜事接二連三發生，但估唔到細女有咗令喜事延續至龍年。
最近「雙非」孕婦來港產子問題，令本地婦產科服務出現緊張情況，橄欖愛女都受影響，要一萬蚊先至預訂到床位，比原價貴咗四千蚊。不過，錢銀多少都係次要，事關橄欖添多個乖孫，相信幾貴佢都願意畀。講開今年新春天氣凍，橄欖深深感受到，因為佢間大宅位處高地，估計最少低一至兩度，就算喺大宅入面開埋暖爐都要着羽絨，有幾凍真係可想而知喇。