主管特區財政嘅鬍鬚曾，自○七年上任至今，表現差強人意，怕且都冇得留任下屆政府。唔知鬍鬚曾係咪知道就快冇得撈，最近接受《讀書好》月刊訪問時暗批啲政客為咗喺競選中贏得支持，猛開「空頭支票」，完全冇量入為出，咁講法，除咗針對政黨外，好明顯係針對緊啲特首參選人，擺明係冇得撈發爛渣。
被問到政府加大干預市場係咪未來嘅趨勢，鬍鬚曾話，好多出現財務問題嘅國家，尤其係歐洲，係長期無節制處理公共財政，作出超乎能力嘅承諾所造成，呢種情況其實係政治問題，而非經濟問題。佢話：「往往出於政治原因，或為在競選中贏得支持，政客常作出超過能力上限的承諾，根本就冇量入為出。」
幾位特首參選人一向都話政府對市場要適度有為，鬍鬚曾咁講，擺明同下屆政府對着幹。佢仲話現時認同左翼思想嘅年輕人，同六十年代嗰種強調大同、理想社會嘅主義好唔同，依家啲人主要關注個人利益，要求重新分配，少咗動力創造自己。但點解佢唔反問政府有冇提供機會畀年輕人呢？