政情：民記大想頭 兵分三路爭新西
我哋尋日講過，原本諗住出戰立法會新界西嘅新民黨副主席田北辰，密謀改循超級區議會議席參選，令建制派喺新界西多咗個議席，加上今屆議席由八席加到九席，因而盛傳民建聯（民記）打算派出三隊人參選。不過，新界西選情一向立立亂，除咗泛民主派爭位外，民記過去亦得罪人多，好似牙齒印極深嘅鄉事派都有人諗住出選，難怪有政圈人話民記太過大想頭喇。
一般相信，建制派喺新西嘅議席坐四望五，而內部亦為分呢個餅而爭拗不斷，單是民記就狼到出三隊參選，務求喺現時兩席之上再取多一席。有民記中人透露，三隊領軍人分別係主席譚耀宗、副主席蔣麗芸及荃灣區議員陳恒鑌。至於一直喺新界西選開嘅張學明，有傳話佢未必會參選，所以交棒畀嫡系陳恒鑌。睇落民記似乎諗得好完美，但鄉事派會否幫民記抬轎確係疑問。
鄉事派勢做攔路虎
民記同鄉事派有過節係公開嘅秘密，遠嘅唔講，淨係睇民記喺今屆區議會換屆已相當霸道，搶咗好多區議會主席位之餘，就連副主席位都唔留畀鄉事派，好似落選元朗區議會副主席嘅十八鄉鄉委會主席梁福元，事後就表明唔妥民記。另外，前青衣鄉委會主席鄧國綱，喺去年鄉委會改選中亦輸畀親民記嘅鄧瑞華，據講鄧國綱已經入晒民記數，令雙方牙齒印日深。
萬一新界西鄉事派堅決拒幫民記抬轎，民記選情肯定受影響，但唔好忘記，身兼律師會會長嘅屯門鄉委會主席何君堯一直有意循新界西出選，如果佢真係加入戰團，肯定分薄建制派嘅票源。仲有分析話，民記派三隊人出選，除非分票能力好高，否則萬一票源側重晒喺譚耀宗條隊，分分鐘連第二隊領軍嘅陳恒鑌都輸埋，到時真係偷雞唔到蝕揸米。所以話呢，民記想全取三席似乎大想頭咗啲囉！