中環出更：西九CEO讀政治搵工徬徨
唔少大學畢業生都對前景感到徬徨，就連老一輩嘅西九文化區管理局行政總裁連納智（Michael Lynch）都唔例外。連納智日前出席電台節目訪問時，自爆讀大學時主修政治，畢業後曾懊惱搵份乜嘢工好，幸好當時有機會喺悉尼歌劇院工作，從中搵到興趣，開始投身藝術領域工作，眨眼間至今已經三十年。
欣賞港人不斷學習精神
不過，連納智嘅經歷唔係一句好彩咁簡單，事關佢小時候學過吹圓號，亦都熱愛大提琴，喺體內早已播下藝術種子，所以先至咁順利全情投入歌劇嘅工作。工作多年，連納智最難忘喺小型劇院工作，因為從構思歌劇至選角、排演、行政、宣傳等工作都可以親身參與，所以好感恩呢啲經歷造就咗今日嘅佢。
連納智上任已逾半年，佢好欣賞港人不斷學習嘅精神，鼓勵大家放眼世界，接收更多新事物。講到本地藝術，佢話藝術工作者除咗專注創作之外，仲要兼職維生，所以社會應給予藝術工作者更大嘅支持。佢又希望將來落成嘅西九唔單止淨係有表演時先至吸引到市民，而係真真正正融合生活同藝術嘅場地，甚至係大眾散步或與朋友聚首嘅好地方，以豐富下一代嘅文化生活。
卓妮