中環出更：全家遊馬國 肥亨新年暖笠笠

肥亨對今次行程讚不絕口，尤其是風光如畫嘅浮羅交怡，夕陽、椰樹互相映照嘅海灘景色，簡直媲美世外桃源，話好值得推介。咁啱當地旅遊局官員係佢老友，肥亨嫌個地名翹口難讀，同老友建議應該改名為「靚加怡」，仲要快啲開通香港直航機，到時就一定有好多香港人去玩喇！

原來今次嘅溫馨假期由細女露玲全程統籌，肥亨好滿足話，以前規劃家人出遊嘅細節由作為爸爸嘅佢一手負責，但依家囡囡大咗，就唔使佢操勞，只係到適當時候現身同畀錢就得嘞。肥亨講起兩個女就笑到見牙唔見眼，大女露明婚後首次帶埋女婿Kevin同遊，同行仲有肥亨阿妹、妹夫及一對子女，一行九人玩得盡興而歸。

馬時亨夫婦（左四、三）同親友外遊度歲。左起：妹夫、妹妹；右起：姨甥女、姨甥、大女婿、大女露明及細女露玲。（受訪者提供）

馬來西亞浮羅交怡風景宜人，係旅遊及避寒嘅好地方。（資料圖片）

做外公順其自然

講開龍年生龍B，原來肥亨都係屬龍嘅，幾多歲就大家估吓喇，至於佢想唔想大女生番個龍B，佢就話要交番畀啲後生揸主意，總之一切順其自然，唔知肥亨龍年可否成功做外公呢？

卓妮