近排本港有關民意調查嘅風波不斷，曾經批評港大民意調查唔科學、唔合邏輯嘅中聯辦宣傳文體部部長郝鐵川，過完年之後都唔識收口，尋日再喺報紙撰文，不點名批評香港某啲機構十幾年來嘅民調活動，都係為特定政團利益服務，又話干預學術自由嘅定義，應該係以強權阻撓學術研究同發表，佢只係批評幾句唔算干預喎。
之前批評過郝鐵川係「過氣學者」嘅港大民調總監鍾庭耀，下午火速出稿再次寸爆郝鐵川，話對方由閉門向個別傳媒吹風批評佢，到依家公開喺報章撰文發表意見，本身都算係一種「進步」。佢又質疑郝鐵川對學者社會角色同民調活動嘅認識，與本地大學政策同學者嘅認識「背道而馳」、「有天淵之別」，非常尖酸到肉。
其實鍾庭耀都唔使對有關文章咁上心，郝鐵川話影響學術研究發表先算干預學術自由，可能佢今次講緊嘅，係同郝鐵川一樣來自內地、紅色背景濃厚嘅浸大傳理學院院長趙心樹，暗批佢使橫手令浸大特首選舉民調「早洩」係干預學術自由，唔係想鬧港大。