政情：莫宜端被誤會又有喜
政府推出副局長同政治助理已有三年半時間，但市民對佢哋嘅認知度唔係好高，淨係知佢哋人工高，同埋記得佢哋喺政務司司長官邸門口影過嘅大合照。不過，呢次大合照一直好困擾勞工及福利局政治助理莫宜端（Zandra），因為佢當時大緊肚，之後每當電視台重播有關大合照片段時，啲朋友睇到就誤以為佢又有咗，最弊係連佢三歲嘅囝囝都好奇。
曾經做過傳媒嘅Zandra就開玩笑話，曾經諗過自拍一段影片畀傳媒使用，唔使再播舊片喎。
講起生育，好多人都想趁今年生番個龍仔或龍女，但原來Zandra嘅囡囡已經喺去年底搶閘出世做兔女郎，依家已有三個月大，眼仔睩睩好得意，而且仲同Zandra細個時個樣成個餅印咁。
Zandra依家有對仔女已湊成個「好」字，如果宣布正式「收工」，咁就唔會再有人誤會佢有咗啦。